Седум советници од ВМРО-ДПМНЕ и коалицијата, седум советници од СДСМ и коалицијата е еден советник од Левица ги добија своите уверенија и ќе бидат претставници во Советот на Општина Неготино.
Ова е прв пат неготинскиот Совет да добие советник од Левица, а станува збор за Леон Ристов, кој освои 1.035 гласа на советничката листа. Листата на ВМРО-ДПМНЕ и коалицијата освои 4.776 гласа, а пак на СДСМ освои 4.336 гласа, што значи дека Левица доби околу една четвртина од гласовите кои поединечно ги освоија листите на двете најголеми партии.
На што се должи брзиот раст на поддршката на Левица во Неготино, неготинчани кратко коментираат дека пресудно било незадоволството од двете најголеми партии, и желбата за позитивни промени во градот.
-Да се даде шанса на нови ликови, оти цели 30 години ротираат истите, а конкретен напредок во градот не може да се забележи – велат дел од оние кои го дале својот глас за Левица.
За влез во Советот во Општина Неготино се бореа и ТМРО, МААК и Единствена Македонија, но според бројот на освоени гласови не обезбедија ниту еден советник.
Вики Клинчарова