„Во изминатите четиринаесет години, пратениците од ДПМНЕ, СДСМ и ДУИ си ги наполнија џебовите со вртоглави шест и пол милиони евра народни пари преку злоупотреба на патните трошоци! Затоа Левица поднесе Предлог – закон за ограничување на патните трошоци кој задутре, на 12 февруари, ќе биде ставен на Дневен ред на собраниската седница“ велат од Левица.
Од партијата ги повикаа сите пратеници кои тврдат дека работат во интерес на граѓаните, „да застанат зад оваа мерка, да го поддржат Предлог – законот за ограничување на патните трошоци и да стават крај на грабежот! Законот предложен од Левица е со методологија за пресметка на надоместокот за патни трошоци – ограничен на реалната потрошувачка од 6,5 литри гориво на 100 километри“.
„Реалноста е дека во изминатите четиринаесет години со тие шест и пол милиони евра народни пари, можеше да се изгради целосно нова болница, да се обноват сите студентски домови во земјава или да се изградат 10 нови градинки. Левица е единствената партија која никогаш нема земено ниту денар по овој основ и веќе два мандати се бори да ја запре оваа пракса. Додека граѓаните едвај врзуваат крај со крај, политичките елити бесрамно го исцрпуваат буџетот преку криминални патни налози и фиктивни километражи“ е ставот на Левица.