Левица: Полиција со кучиња ги испразнија шаторите на камперите и правеа претрес

Безбедносните структури утрово, околу 6.00 часот, упаднаа во кампот пред Собранието на Република Македонија, каде што кампуваат активисти на Левица, а воедно голем дел од нив се членови на Црвена младина, велат од политичката партија Левица.

„Без никакво предупредување и со дрско однесување правеа претрес со кучиња и ги испразнија шаторите на камперите, кои мирно и достоинство кампуваат од синоќа.

Истовремено, бевме сведоци како истите структури пред неколку дена дозволија вперување на пиштоли кон граѓаните кои мирно протестираа, каде целосно изостана нивната реакција.

Неуспешни се сите обиди за заплашување на министерот Оливер Спасовски да внесе страв меѓу граѓаните“, сe наведува во соопштението до јавноста.