Косовскиот премиер Албин Курти денеска изјави дека Србија ја интензивира соработката со Русија, Кина и Иран, предупредувајќи дека поради тоа постои реална опасност од „нова војна во регионот“.
На конференцијата за одбрана во Лондон, тој рече дека усогласувањето на Србија со Русија, „деструктивниот пристап“ кон Косово и огромното вооружување се „показатели дека Србија се стреми кон ескалација со намера да ги оствари своите територијални амбиции“.
Косовскиот премиер посочи дека во време кога Европа доживува војна, мислејќи на војната во Украина, „не можеме да ја игнорираме заканата од нова војна во регион кој многу добро знае што значи тоа“.
„Три од четирите бригади на здружената српска армија, вклучително и 48 напредни бази околу границата со Косово, без други специјализирани единици, се стационирани на југот на територијата, во близина на границата со Косово. Заканата не е само теоретска. Ризикот од нова војна е реален“ – рече тој.