Од МВР информираат дека е расчистен случајот со закани кон судија од Уставен суд и е поднесена кривична пријава. Оттаму не откриваат против кого е пријавата, но дознаваме дека е поднесена против поранешниот пратеник Самка Ибраимовски.
-Министерството за внатрешни работи целосно го расчисти случајот пријавен до Секторот за компјутерски криминал на 24.06.2024 од страна на претседателот на Уставниот суд Д.К., кој пријави закани по животот и безбедноста на судија на Уставен суд упатени од С.И. преку социјална мрежа. Веднаш по добиената пријава, МВР презеде соодветни мерки и беше извршен службен разговор со С.И. во СВР Тетово. Денеска (26.06.2024) Секторот за компјутерски криминал до ОЈО Скопје поднесе кривична пријава против С.И. (69) за сторено кривично дело „загрозување на сигурноста“ чл.144 ст.5 предвиденo и казнивo според Кривичниот законик. Пријавениот С.И. на својот фејсбук профил упатил сериозни закани и повици за насилство кон судија на Уставниот суд, велат од МВР.
Ибраимовски вчера тврдеше дека не се заканувал на уставни судии, појаснувајќи дека неговите фејсбук статуси биле негово демократско право.