Управата за финансиска полиција поднесе кривична пријава против директорот на МРТВ, Маријан Цветковски, поради сомнеж за злоупотреба на службената положба.
Како што беше посочено на денешната прес конференција, пријавата е поднесена до Основното обвинителство.
-Осомничениот М.Ц. во 2015 година е осомничен дека ја злоупотребил службената положба. Земал кредит од 140 милиони денари, а заложил имот во вредност од 294 милиони денари, односно го заложил целокупниот движен и недвижен имот на МРТВ без да побара согласност од Собранието, истакна Даниела Велковска, од Управата за финансиска полиција.
Кривична пријава е поднесена и за нотарката З.П. која ги заверила спорните договори.
-Дел од добиениот кредит во износ од 30,3 милиони денари М.Ц. веднаш го искористил за подмирување на достасани обврски кон Банката давател на кредитот и доверител, по основ на претходен откуп на побарувања од правниот субјек БЕГ-Снабдување центар ДООЕЛ Скопје, истакна Велковска.
Од почетокот на годинава па се до сега, Управата за финансиска полиција поднела 28 кривични пријави против 51 физичко лице и 28 правни субјекти. Штетата пак која била предизвикана се пресметува на 8,3 милијарди денари. Овие податоци ги сподели директорот Арафат Муареми.
Муареми најави и дека во следниот период ќе поднесат нови кривични, кои ќе ги финишираат во наредните денови.