СВР Куманово поднесе кривична пријава против поранешната министерка за внатрешни работи, Гордана Јанкуловска, за злоупотреба на службената положба. Како што велат од Секторот за внатрешни работи Куманово, пријавата е поднесена до Основното јавно обвинителство Куманово поради постоење основи на сомнение за сторено кривично дело.
Кривичното дело се однесува на случај од 2012 година. Јанкуловска се товари дека вработила сопруга на висок полициски функционер во МВР која немала соодветно образование.
„Г.Ј., поранешен министер за внатрешни работи на Република Македонија, во текот на 2012 година, во повеќе наврати, избегнувајќи ја законската регулатива за вработување на приправници во отворена и јавна постапка со објавување на јавен оглас, се обратила до Министерството за финансии со барање за обезбедување на финансиски средства за вработување на 70 лица-приправници со високо образование и 30 лица-приправници со средно образование. Притоа, во барањето посочила дека за пет работни места со високо образование ќе биде објавен јавен оглас, додека за 65 приправници со високо образование и 30 приправници со завршено средно образование вработувањето ќе се изврши без објавување на јавен оглас, со обезбедување на финансиски средства за бруто плата за 30 приправници со средно образование во висина од 15.028 денари по вработено лице.
На 06.06.2012 година пријавената, за работно место за кое е предвидено четиригодишно стручно образование, вработила лице – сопруга на висок полициски функционер во МВР, која е со несоодветно образование, односно со тригодишно средно образование, за што склучила Договор за вработување, со целосен износ на месечна плата од 620 бодови, без внесена клаузула Приправник. На тој начин бил избегнат задолжителниот намален износ на исплата на месечна плата додека трае приправничкиот стаж, со што пријавената го оштетила МВР и буџетските средства во периодот од 06.06.2012 година досега во вкупен износ од 1.724.885 денари“, соопштија од таму