Кољо до Вељаноски: Дали мирно спиете, ја знаевте целата вистина која не ја кажувате овде!

Сепак Вељаноски не одговори на ова прашање бидејќи приговараше одбраната на неговиот телохранител, а судот го прифати приговорот. Кољо го праша претходниот претседател на Собранието и дали тој ја дал наредбата да се отворат вратите на Парламентот, за народот да влезе и, како што рече, да направи општ хаос. На тоа Вељаноски негираше.

-Ниту сум помислил ниту сум кажал некому да ги отвори вратите. Јас сум бил претседател на Собранието и знам што значи таа институција – одговори тој. Кољо го праша и дали такви наредби дал преку вибер комуникација и преку смс пораки, на што Вељаноски повторно одрече велејќи дека тоа не е вистина.

-Дали е точно дека вие како пратеници не ја завршивте вашата работа поради што го наведовте народот да ја заврши? -праша обвинетиот, но не успеа да го испровоцира Вељаноски, кој рече само дека пратениците имаат друга функција.

-Ќе се согласите ли дека пратениците Мукоски и Василевски не требале да ги отворат вратите на своја рака, дека има внатрешно обезбедување и дека требале од него да побараат отворање на вратите? – праша тој.

-Кој ги отвори вратите ќе си утврди судот и тој ќе каже, јас не сум дојден да давам констатација за тоа – одговори Вељаноски.

На што Кољо рече дека изгледа тој не бил претседател на Собранието во дадениот период.