Павел Дуров, руско-францускиот милијардер, основач и извршен директор на апликацијата за пораки Телеграм, беше уапсен вчера вечерта на аеродромот Бурже во близина на Париз. Дуров патувал со приватен авион, објави ТФ1 на својата веб-страница, додавајќи дека во Франција е издаден налог за апсење како дел од прелиминарната полициска истрага.
TF1 и BFM пренесоа дека истрагата е фокусирана на недостаток на модератори на Телеграм и дека полицијата верува дека оваа ситуација дозволува криминалните активности да се одвиваат непречено на апликацијата за пораки. Дуров денеска ќе се појави пред судот.
Но, кој стои зад една од најпопуларните апликации за пораки во светот?
Павел Дуров е роден на 10 октомври 1984 година во Санкт Петербург. Во 2006 година дипломирал англиска филологија и превод на Филолошкиот факултет на Државниот универзитет во Санкт Петербург, пишува руски Комерсант.
Додека студирал на Државниот универзитет во Санкт Петербург, тој создал форум за студенти, врз основа на кој социјалната мрежа VKontakte е лансирана во 2006 година. Во 2014 година, тој продаде 12% од својот удел во VKontakte на Иван Таврин, кој подоцна беше купен од Mail.ru Group.
Во август 2013 година, Павел Дуров воведе бесплатен месинџер Телеграм со затворен извор, а популарноста на апликацијата неверојатно порасна. Дуров (39) ја напушти земјата во 2014 година, една година по лансирањето на Телеграм, откако одби да ги исполни барањата на владата да им забрани на опозициските политичари и групи да пристапуваат до ВКонтакте.
„За жал, невозможно е да се води интернет бизнис во оваа земја“, рече тој тогаш. Извесно време живеел и во Соединетите Американски Држави.
Во 2021 година добил француско државјанство, а во 2022 година државјанство на Обединетите Арапски Емирати. Тој има и пасош од карипската нација Сент Китс и Невис. Во април 2022 година, тој побара да не се нарекува државјанин на Руската Федерација, туку само „Европејец“.
„Форбс“ моментално го проценува неговото богатство на 15,5 милијарди долари, што го прави 120. најбогат човек во светот, а некои го нарекуваат „Рускиот Марк Цукерберг“.
Дуров објави дека во минатото бил донатор на сперма и дека сега има повеќе од 100 биолошки деца во 12 земји во светот. Тој никогаш не бил во брак, пренесува Sky News.
Во интервју за Такер Карлсон во 2024 година, тој изјави дека никогаш не сакал да се збогати, а неговата главна цел била да биде слободен човек. Тој рече и дека не сака да прима наредби од никого. Според Дуров, на сметките има неколку стотици милиони долари кои воопшто не ги користи.
Апликацијата Telegram стана највлијателна во Русија, Украина и поранешните советски републики. Меѓутоа, Русија почна да ја блокира апликацијата во 2018 година, откако компанијата одби да се усогласи со судскиот налог за давање пристап на државните безбедносни служби до шифрираните пораки на своите корисници. Ваквата одлука предизвика масовни протести во Москва и критики од невладините организации, но не ја наруши значително популарноста на апликацијата.
Откако Русија ја започна својата инвазија на Украина во 2022 година, Телеграм стана главен извор на нефилтрирани, а понекогаш и експлицитни и погрешни содржини од двете страни за војната и политиката зад конфликтот. Платформата на некој начин стана „виртуелно бојно поле“. Телеграма, која им овозможува на корисниците да ја избегнат официјалната контрола, исто така стана едно од ретките места каде што Русите можат да пристапат до независни вести за војната откако Кремљ ги зголеми ограничувањата за независните медиуми по инвазијата на Украина.
Според компанијата, апликацијата е меѓу петте најсимнувани во светот. Во 2023 година надмина 700 милиони активни месечни корисници, а нивната цел е да надминат една милијарда во рок од една година.
Сепак, зголемената популарност на апликацијата доведе до зголемена контрола од неколку европски земји, вклучително и Франција, поради можните грижи за безбедноста и приватноста.