Акустичниот концерт на бендот Галија, кој синоќа се одржа во Хераклеа, Битола, поминал со почитување на сите здравствени мерки и препораки за заштита од Ковид-19.
На настанот кој беше во организација на Сцена продукција имало 727 гости, се носеле заштитни маски и се одржувало потребното растојание.
-Задоволни сме од целокупниот настан, благодарни на публиката за покажана свест. Немаше прекршување на мерките, Галија блеснаа во едно светло кое е својствено за нив, посетителите имаа убава вечер исполнета со добра музика – за ,,Фокус” појаснува Влатко Јовановски од продукцијата.
Додава дека и самиот имал трема пред концертот, бидејќи одговорноста да се организира еден настан во ек на пандемија, според сите задолжителни протоколи е голема одговорност.
-Со дрон направивме снимки пред и потоа, односно пред да дојде публиката, и потоа, додека траеше концертот. Сакаме јавноста да знае дека и нам, како на организатори ни е исклучително важна безбедноста и почитувањето на мерките.
Не радува што гостите по настанот ни честитаа за добрата организација, што покажавме дека и во време на Ковид-19 можеме да се забавуваме, без било кој да биде загрозен. Во иднина најавуваме уште концерти на легендарниот бенд Галија, во повеќе градови во земјава, а на седми септември во Хераклеа го организираме концертот на Нокаут, со Игор Џамбазов и Венко Серафимов како специјални гости – изјави Јовановски.
За концертот на Галија и на Нокаут, Општина Битола одвоила поддршка од 250.000 денари.
Вики Клинчарова