Кина постави ниска цел од околу 5 отсто за овогодинешниот економски раст, се вели во извештајот на кинеската влада објавен на почетокот на годишната седница на кинескиот парламент.
БДП на Кина минатата година порасна за само три проценти, што е еден од најслабите резултати во последните децении, намален под притисок на мерките воведени поради Ковид 19, кризата во секторот на недвижности, сузбивањето на приватното претприемништво и намалената побарувачка за Кинески извоз.
Во извештајот на почетокот на седницата, која ќе трае до 13 март, премиерот Ли Кечијанг ја истакна потребата од економска стабилност и зголемени трошоци, поставувајќи ја целта за отворање околу 12 милиони работни места во градовите оваа година, што е зголемување во однос на минатогодишната цел.
„Наш приоритет мора да биде закрепнувањето и зголемувањето на трошоците“, рече Ли во говорот на почетокот на седницата што траеше нешто помалку од еден час и додаде дека „приходите на жителите на градот и селото мора да се зајакнат преку повеќе канали. ”
Овогодинешниот таргет за раст од околу 5 проценти е помал од минатогодишниот, кој беше околу 5,5 проценти.
Оваа година Кина планира да го зголеми буџетот за војската за 7,2 отсто, што е малку повеќе од минатата година, додека премиерот Ли истовремено настојува да ја зајакне борбената готовност на кинеските вооружени сили.
Пекинг, како што е најавено, има намера да потроши 225 милијарди долари за одбрана, а како и претходните години не беа презентирани никакви детали, само вкупната сума и стапката на пораст.
Зборувајќи за вооружените сили на Кина, Ли рече дека треба да посветат поголемо внимание на обуката во борбени услови и да ја зголемат борбената готовност.
„Нашите вооружени сили, фокусирани на одбележувањето на стогодишнината од Народноослободителната армија во 2027 година, треба да се подготват за воени операции и да ја зајакнат борбената готовност“, рече Ли.
Кина ја има најголемата војска во светот и нејзиниот развој и стратешките намери на Пекинг се причина за загриженост во регионот и во Вашингтон. Пекинг редовно тврди дека издвојува релативно низок процент од БДП за армијата и одбраната и дека критичарите сакаат да ја прогласат Кина за закана за светскиот мир.
Вооружените сили треба да развијат нови воени стратешки насоки, да посветат повеќе енергија на обука во борбени услови и да ја зајакнат работата на војската во сите правци и домени, додаде Ли.
Зборувајќи за Тајван, кинескиот премиер рече дека Кина треба да промовира мирен развој на односите со Тајван и да предложи процес на кинеско „мирно обединување“, но и да преземе решителни чекори за да се спротивстави на независноста на Тајван.
Кина, која тврди дека Тајван е нејзина територија, ја засили воената активност во близина на островот во последните три години како одговор на, како што го нарекува „таен договор“ меѓу Тајпеј и Вашингтон, главниот меѓународен снабдувач на оружје на Тајван.
Ли рече дека Пекинг се уште инсистира на принципот „една Кина“, според кој Тајван е дел од Кина.