Кинескиот стартап DeepSeek предизвика значителен пресврт на глобалниот технолошки пазар со лансирањето на својот напреден асистент за вештачка интелигенција, кој неодамна стана најсимнуваната бесплатна апликација на App Store на Apple во САД, надминувајќи ја ChatGPT на OpenAI.
Кој стои зад кинеската вештачка интелигенција?
DeepSeek е основана во 2023 година како истражувачка група на кинескиот квантитативен хеџ фонд High-Flyer, исто така основан од претприемачот Лианг Венфенг. Компанијата се наоѓа во Хангжу, во источната кинеска провинција Жеџијанг. Лианг Венфенг, роден во 1985 година, дипломирал на Универзитетот Жеџијанг со диплома по електротехника во 2006 година, а во 2010 година магистрирал информатичко-комуникациско инженерство, фокусирајќи се на машинскиот вид.
По дипломирањето, тој експериментирал со примена на вештачка интелигенција во различни области, вклучувајќи ги и финансиите. Во 2015 година, тој го коосноваше High-Flyer, квантитативен хеџ фонд кој користи алгоритми за вештачка интелигенција за тргување. До 2019 година, High-Flyer управуваше со средства во вредност од над 10 милијарди јени (околу 1,5 милијарди американски долари). Сепак, Лианг имаше поголеми амбиции – сакаше да создаде нешто што ќе го промени светот.
Лианг Венфенг и DeepSeek ја застапуваат филозофијата на „ВИ за сите“, нагласувајќи дека технологијата треба да биде достапна за сите, а не само за големите корпорации.
Најновиот модел на DeepSeek, DeepSeek-R1, претставен во јануари оваа година, е со отворен код и покажува перформанси споредливи со водечките западни модели, и покрај ограничените ресурси.
Моделот користи напредни техники како расудување „синџир на мисли“ и ја демонстрира способноста да се само-подобрува без човечки надзор. Овој модел стана симбол на технолошките иновации на Кина и предизвика поширока дебата за глобалната доминација во секторот за вештачка интелигенција.
DeepSeek беше во можност да развие напреден јазичен модел користејќи многу помалку ресурси од своите конкуренти, користејќи чипови од пониска класа, како што е Nvidia H800, за само два месеци. Компанијата соопшти дека потрошила само 5,6 милиони долари за развој на својот нов модел, во споредба со стотиците милиони, па дури и милијарди долари што американските компании ги трошат на своите технологии за вештачка интелигенција. За екстремно ниската цена на оваа технологија најпрво пишуваше Wall Street Journal.
Успехот на асистентот за вештачка интелигенција на DeepSeek предизвика значителен пресврт на глобалниот пазар. Индексот S&P 500 падна за 1,4%, додека технолошкиот Nasdaq потона за 2,3%. Индексот Дау остана непроменет.
Акциите на американските технолошки гиганти, вклучувајќи ги Nvidia, Microsoft и Meta, паднаа по веста за напредокот на DeepSeek.
Nvidia, клучен играч во дизајнот на чипови со вештачка интелигенција, забележа пад на нејзините акции за речиси 12 проценти поради загриженоста дека DeepSeek може да ја загрози побарувачката за скапите чипови на Nvidia и да ги оспори високите цени на технолошките акции кои досега главно се зголемија на очекувањата од технологиите за вештачка интелигенција.
Слични падови се забележани и во други технолошки компании, вклучувајќи ги Мета и Алфабет (матичната компанија на Google), што укажува на загриженоста на инвеститорите за одржливоста на американската доминација во секторот на вештачката интелигенција.