Истражувањето објавено денеска од невладината организација Global Energy Monitor (GEM) покажа дека Кина има 180 гигавати (GW) соларна енергија во изградба и 15 GW енергија од ветер. Тоа го носи вкупниот капацитет на ветер и сончева енергија во изградба на 339 GW, многу пред 40 GW во изградба во САД.
Капацитетот на ветроелектраните и соларните електрани што се градат во Кина сега е речиси двојно поголем од оној на остатокот од светот, објави Гардијан.
Истражувачите ги набљудувале само соларните електрани со капацитет од повеќе од 20 мегавати, кои директно ја напојуваат мрежата. Ова значи дека вкупната количина на соларна енергија во Кина би можела да биде многу поголема, бидејќи малите соларни постројки сочинуваат околу 40 отсто од соларниот капацитет на Кина.
Наодите ја истакнуваат водечката позиција на Кина во глобалното производство на обновлива енергија во време кога САД се повеќе се загрижени за кинескиот прекумерен капацитет и дампинг, особено во соларната индустрија.
Кина бележи бум на обновливите извори на енергија во последниве години, поттикнат од силната владина поддршка. Претседателот Си Џинпинг ја нагласи потребата од „нови квалитетни продуктивни сили“, слоган што ја означува желбата да се насочи кинеската економија кон технологија и иновации.
Помеѓу март минатата година и март оваа година, Кина инсталираше повеќе соларна енергија отколку во претходните три години и повеќе од остатокот од светот заедно во 2023 година, утврдија аналитичарите на GEM и посочија дека е на пат да достигне 1.200 гигавати инсталирани ветроелектрани и соларни капацитети до крајот на 2024 година, шест години пред поставената цел на владата.
„Ненамалениот градежен бран гарантира дека Кина и натаму ќе биде лидер во инсталациите на ветерна и соларна енергија во блиска иднина, многу пред остатокот од светот“, се вели во извештајот.