Парична казна за судијата Енвер Беџети од Апелациониот суд Скопје, за кого Судскиот совет утврди дека 9 месеци го чувал предметот „Тврдина-Таегет” за да застари.
Судскиот совет денеска одлучил да го казни Беџети со 20 отсто од платата во наредните 6 месеци.
Додека Беџети беше критикуван дека како судија известител без причина не го изнесувал на седница предметот за масовното незаконско прислушување и се бараше негова одговорност, Судскиот совет ја чуваше неговата постапка во фиока, зашто беше кандидат на огласот за врховен судија.
Беџети го турна конкурсот, бидејќи затоа што не доби гласови за унапредување, членовите Албанци во Судскиот совет не ги гласаа кандидатите Македонци.
Оттогаш, Судскиот совет не распишува нов оглас за упразнетите места за кривичари во Врховниот суд.
На 11 јануари Судскиот совет констатираше дека нема образложени причини зошто предметот за масовното незаконско прислушување познат како „Тврдина-Таргет“ судијата – известител Енвер Беџети од Апелациониот суд Скопје не го ставал 9 месеци на одлучување. Со тоа се создадени услови овој предмет од многу висок јавен интерес да застари и да се затвори.
Како и другите предмети на СЈО за организиран криминал и корупција, и овој предмет беше фрлен на буниште, вратен назад на повторно судење.
Со своите одлуки Апелациониот суд Скопје се здоби со имиџ спасител на функционери сторители на тежок криминал и висока корупција, како и заштитник на моќни луѓе од бизнисот.