Хашкиот осуденик Радован Караџиќ (79) издржува доживотна затворска казна во затворот Албани на островот Вајт во Англија, а неодамна одлучи да ја тужи владата на Обединетото Кралство за нехумано постапување кон него.
Како што пишува Дејли Мејл, Караџиќ се жали затоа што не смеел да внесе лаптоп во ќелијата, а поради кршење на човековите права бара од владата да му плати 50.000 фунти (58.000 евра). Тој тврди и дека му е забрането да комуницира на српски, неговиот мајчин јазик.
Минатата недела Караџиќ се појави пред судот преку видео врска за да ја тужи државната секретарка за правда Шабана Махмуд.
Неговата ќерка Соња Караџиќ-Јовичевиќ неодамна за босанските медиуми изјави дека здравјето на нејзиниот татко е нарушено и дека во јуни во неколку наврати изгубил свест и дека при падовите ги повредил главата, колкот, ребрата и двете рамења. Таа исто така тврдеше дека „не му се дава никаква медицинска помош“.
Караџиќ пред три години беше префрлен од Холандија во Британија на отслужување на казната. Неговата ќерка тогаш изјави дека нејзиниот татко бил испратен на југот на Англија само за да им отежне на членовите на семејството да го посетат.
На 20 март 2019 година, Радован Караџиќ беше осуден на доживотен затвор за геноцид и други злосторства извршени во БиХ помеѓу 1992 и 1995 година.
Тој беше прогласен за виновен за геноцид во областа на Сребреница во 1995 година, прогон и убиства на Бошњаци и Хрвати низ Босна и Херцеговина, тероризирање на населението во Сараево со гранатирање и снајперски оган и земање на припадници на меѓународните мировни сили како заложници.
Караџиќ беше фатен на 21 јули 2008 година во Белград, каде што се криеше под лажен идентитет (како доктор Драган Дабиќ), а од крајот на јули 2008 година е во притвор на Хашкиот трибунал.
