Гостиварчанец почина денеска откако бил прегазен од товарно моторно возило „ман” со мешалка за бетон, информираа од полицијата. Идентитетот на настраданиот се уште не е познат.
Според СВР Тетово, околу 15:30 часот денеска било пријавено дека се случила сообраќајна незгода на крстосницата на улиците „Гоце Делчев” и „Беличица” во Гостивар. Според пријавата, камионот мешалка бил управуван од 56-годишниот М.К. од гостиварско Беловиште, и удрил во повозрасно машко лице со велосипед, чиј идентитет засега не е утврден.
– Во несреќата, лицето се здобило со тешки телесни повреди од кои починало, наведуваат од СВР Тетово.
На местото на несреќата се врши увид што го води јавен обвинител, а во кој учествува и екипа од Одделението за внатрешни работи Гостивар. По наредба на јавниот обвинител ќе се врши обдукција.