Цените на електричната енергија во Европа продолжуваат да уриваат рекорди, интензивирајќи ја енергетската криза во регионот.
Цените скокнаа откако руски Газпром објави дека ќе го затвори гасоводот Северен тек 1 на три дена, почнувајќи од среда за да изврши работи за одржување, што повторно ги разгоре стравувањата дека Москва би можела целосно да го исклучи гасот за Европа.
Порталот „Пари“ пишува како земјите членки на ЕУ им помагаат на граѓаните полесно да се справат со високите сметки.
На почетокот на август, Италија одобри нов пакет помош во вредност од околу 17 милијарди евра за да им помогне на фирмите и семејствата да се заштитат од зголемените трошоци за енергија и зголемувањето на потрошувачките цени.
Владата ќе го продолжи бонусот од 200 евра исплатен во јули на Италијанците со низок и среден приход кои претходно не го добивале.
Италија, исто така, ја објави својата намера да ги оданочи компаниите кои профитираат од повисоките цени на енергијата и промовира ограничување на цените на гасот на европско ниво за да помогне во задржувањето на скоковите на цените.
И Шпанија одлучи да ги оданочи оние енергетски компании кои профитираат од зголемувањето на цените на енергијата и да ги искористи собраните пари за да им помогне на своите граѓани да ги платат сметките.
Мадрид веќе го намали данокот на додадена вредност на сметките за енергија од 21 отсто на 10 отсто, додека, исто така, го намали постојниот данок на електрична енергија од 7 отсто на 0,5 отсто.
Франција, исто така, нуди еднократна исплата на своите граѓани за да им помогне да се соочат со тешки времиња, иако со само 100 евра тоа е значително пониско отколку во Британија и Италија.
Но, Франција го принуди државниот снабдувач на енергија ЕДФ да го ограничи растот на големопродажната цена на електричната енергија на 4 отсто за една година.
Холандската влада, која очекува инфлацијата да достигне 5,2 отсто оваа година, им нуди на домаќинствата кои ги исполнуваат условите еднократен енергетски додаток од 800 евра.
Во соседството, Грција потроши околу 7 милијарди евра за субвенции за електрична енергија и други мерки од септември минатата година за да им помогне на домаќинствата, бизнисите и земјоделците да ги платат сметките за струја и гас.
Бугарија, пак, во мај одобри пакет од 2 милијарди лева (1 милијарда евра) со цел да ги заштити компаниите и потрошувачите со ниски приходи од порастот на цените на енергијата и храната предизвикани од конфликтот во Украина.
