Конзумацијата на ситни риби како што се инчун и сардина наместо црвено месо би спасила 750.000 животи до 2050 година на глобално ниво, велат научниците.
Придобивката најмногу би се почувствувала во посиромашните земји, покажа британската анализа, но и драстично ќе ја намали смртноста од срцеви заболувања во побогатите земји.
Малите риби се богати со хранливи материи со низок јаглероден отпечаток, иако само малку повеќе од една четвртина од фатените се јадат од луѓето. Остатокот се претвора во рибино брашно и рибино масло, кои се користат за исхрана на поскапи морски риби како лосос и пастрмка.
Научниците истражувале дали замената на внесот на црвено месо со овие риби може да ја намали стапката на заболување и да спаси животи.
Хроничните болести сочинуваат околу 70 отсто од сите смртни случаи во светот, велат научниците, а срцевите болести, ракот на дебелото црево, дијабетесот и мозочниот удар сочинуваат речиси половина (44%) од тој број.
Научниците ја проектираа потрошувачката на црвено месо во наредните децении во 137 земји и ја проценија можноста за нивна замена за мали риби користејќи историски податоци за риболов. Проекцијата покажа дека таквата замена може да спречи меѓу 500.000 и 750.000 смртни случаи на глобално ниво до 2050 година, особено од срцеви заболувања.
Истражувачите признаа дека малата риба не е доволна да го замени црвеното месо, но сугерираат дека тоа може да биде „ветувачка алтернатива“.
Тие нагласуваат дека постои „потреба да се ограничи потрошувачката на црвено месо, кое испушта интензивни стакленички гасови и да се префрли на храна која е здрава и еколошка“ во обид да се „намали товарот“ на хроничните болести поврзани со исхраната во наредните децении.
