Израел на никаков начин не е вмешан во смртта на иранскиот претседател Ебрахим Раиси и неговиот министер за надворешни работи Хосеин Амир Абдолахиан, изјави израелски претставник за новинската агенција Ројтерс.
„Тоа не бевме ние“, рече службеникот, кој сакаше да остане анонимен.
Во моментов сè укажува дека хеликоптерот се урнал поради лоши временски услови и слаба видливост, додава Ројтерс и објаснува: Иран и Израел се непријатели долги години, а Израел силно се противи на развојот на нуклеарната програма на Техеран.
Во различен степен, Иран поддржа, финансираше и обучи неколку групи низ регионот на Блискиот Исток, вклучувајќи ги Хамас во Газа, Хутите во Јемен, Хезболах во Либан и бројни други фракции со седиште во Сирија и Ирак.
Израел ретко официјално ги коментира своите активности надвор од своите граници, кои во последните месеци вклучуваат напади во Либан, Сирија и Иран.
Во април, Иран започна директен напад врз Израел, овластен од Раиси, за кој рече дека е одмазда за, како што сметаше, израелски напад врз ирански дипломатски комплекс во сириската престолнина Дамаск, на 1 април, во кој беше убиен висок функционер во Корпусот на гардата на исламската револуција на Иран и уште осум офицери.