Ковид-19 предизвика хаос во светот, колабираше неколку силни здравствени системи, зеде многу човечки жртви, ги затвори луѓето во своите домови, го смени текот на нормалното живеење, сериозно ги разниша економиите, ги турна цените на храната и енергенсите.

Пандемијата на коронавирусот ја разниша довербата меѓу лекарите и научниците, меѓу луѓето, буквално  ја стави на тест европската и светската солидарност.

Колку и да мислевме дека развиените земји имаат протоколи и искуство за справување со вонредни и итни ситуации, сепак во многу земји видовме збунетост, млака реакција, некаде и задоцнета, со многу тешки последици кои произлегоа од тоа. Накратко, Ковид-19 предизвика огромна катастрофа во светот.

-Различните толкувања и немањето прецизна стратегија почнувајќи од Светската здравствена организација создадоа заблуди и недоверба кај луѓето. Еве да ги земеме за пример маските. Прво од СЗО не препорача носење маски, за потоа да го сменат мислењето со тврдење дека имааат докази дека ако маските се користат правилно можат да бидат бариера за потенцијално заразните капки.  Па покрај во затворени простории се бараше да се носат и на отворено, и ако за претходните соеви се препорачуваа најразлични видови маски, па со оглед на тоа како брзо се пренесува Омикрон досега  требаше да носиме гас-маски, вели микробиологот др. Никола Пановски за „Фокус“.

Тој објаснува дека маските може да не заштитат до одредена граница, но носењето на отворено или пак во училиштата каде во училницата учениците се со маски, а во спортските сали без немаат никаква оправданост.

-Истото важи и за ракавиците, можеби вирусот останува н површините, но сепак подоцна се докажа дека не се пренесува преку кожата. Многу недоречености имаше во текот на целата пандемија, па и денеска, што создаде една недоверба во системот и во медицинско-научната фела, со што слободно можам да кажам дека целиот процес беше еден обид за контролирање на луѓето, а помалку грижа за нивното здравје.

Карантини во траење од неколку дена, полициски час, одреден термин за шетање на миленици, беа дел од мерките кои денес изгледаат апсурдно со оглед на тоа дека влијаеше премногу на човековото здравје.

-Кога властите повикуваа седи дома, јас велев излези надвор и сеуште стојам зад тој став. На човекот му е потребен воздух, потребни му се прошетки, доволнио ќе беа рестрикции и контроли за негрупирање, бидејќи мене полиција ме врати дома кога бев сам на прошетка во рекреативниот центар Сарај, каква опасност може да биде сам човек во природа и како ќе го пренесе вирусот, тоа се косеше со сите медицински објаснувања, раскажува Пановски.

Тој додава дека дури и регистрацијата на починатите со коронавирус се прави по погрешна методологија, бидејќи позитивниот тест не значи и болест, односно дека развил болест, но сепак се надева дека новата комисија за заразни болести ќе продолжи да работи во поинаква насока, со нови реформирани протоколи.

-Дали ако падне карпа врз ХИВ позитивен ќе го регистрираме како починат од ХИВ или пак од физичка повреда, ова прашање го поставувам од почетокот на пандемијата, но се случи тоа што се случи, сега ни е потребна подобра стратегија за вакцинација, фокусот да се направи кон хронично болните и повозрасните, со медицински и научен пристап, луѓето да ја разберат доблестана вакцината, да не биде боцкање само за сертификат, туку издражно тие што прележале или помладите сепак остануваат во помалку ризична група иако омикрон се шири и кај вакцинирани и невакцинирани, вели Пановски.

Напорите во  да се поттикне вакцинацијата против Ковид со сертификати кои докажуваат дека некое лице било вакцинирано, тестирано негативно или прележало коронавирус создадоа планина од регулативи, но се помалку заштита.

Пропусниците за Ковид станаа задолжителни за разни јавни настани низ Европа. Владите дали поради збунетост или незнаење почнаа да ги прошируваат мерките и за настани за кои навистина е апсурдно и надвор од секоја логика да се регулираат со пропусници па така до пред само еден месец во Чешка регулативата беше проширена и на колење свињи – предбожиќна традиција во која месар доаѓа во домовите на луѓето за да обезбеди месо за празнични специјалитети. Уредбата вели дека се потребни пропусници за учество на овие „забави за колење свињи“ и дека до 1.000 луѓе можат да присуствуваат на настани каде што обично има само неколку членови на семејството.

Во Англија, пропусниците за ковид сега се потребни во ноќни клубови и пабови со подиуми за танцување или „простори за танцување“. Сепак, условот во пабовите важи само од 1 часот по полноќ, што значи дека гостите можат да одат на местото пред тоа време за да не им бараат потврда од обезбедувањето.

Во Летонија, луѓето на позиции се привремено суспендирани доколку немаат пропусница за ковид. Досега суспендирани се 19 лица вработени во општините низ државата.

Потребна ви е пропусница за да отидете на бензинска пумпа во Литванија. Претходно важеше дека луѓето можеа да влегуваат на бензинските пумпи без нив, но само за помалку од 15 минути. Луѓето без сертификат во Литванија исто така не смеат да влезат во големи трговски центри, спортски сали… Не смеат да влезат во ресторани, но можат да купат храна за носење.

Забрането е престој во црквите без потврда во Грција. Владата одлучи дека невакцинираните лица мора да направат брз тест или да покажат доказ за вакцинација за да можат да одат во црква.Водечкото тело на Грчката православна црква, каде што многу свештеници изразија скептични ставови за вакцините, рече дека не е во позиција да врши проверки на влезовите на црквата.