Стручната комисија на МРТ избра шест песни кои ќе се натпреваруваат на Националниот избор за песна и претставник за Евровизија 2022.
Како што информираат од МРТ, жирито во состав од Мери Попова, Зоран Мирчевски, Биљана Николовска, Александра Јовановска, Јана Бурческа , Маја Трпчановска и Ардита Имери ги преслушале 47-те пристигнати композиции на конкурсот, и од нив ги избрале шесте кои ќе се натпреваруваат.
Станува збор за песни во изведба на Калина Велковска – Кaly, Јон Ајдини – Yon Idy, Лара Иванова, Виктор Апостоловски, Андреа Коевска и Борис Цветановски – Ris Flower.
Насловите на сите песни се на англиски јазик.
-Согласно Правилникот, за избраните 6 композиции, МРТ ќе изработи лирик видеа кои ќе бидат поставени на онлајн платформа за гласање на јавноста. Песните ќе и бидат презентирани на јавноста на 28.01.2022 (петок) во емисијата Стисни Плеј на МТВ, со почеток од 22 часот, кога ќе започне и онлајн гласањето.
Платформата за гласање ќе биде отворена 7 дена, односно до 04.02.2022 година. Победникот ќе се добие по пат на онлајн гласање, како и според гласањето на меѓународното стручно жири во сооднос 50%:50%- соопштија од МРТ.
Вики Клинчарова