Неколку илјади луѓе присуствуваа на погребот на поранешниот италијански премиер Силвио Берлускони во катедралата во Милано.
По воените почести на плоштадот пред Миланската катедрала, како дел од државниот погреб, ковчегот со телото на Берлускони беше внесен во катедралата во придружба на шест карабинери, пишува италијански Ла Стампа.
Влегувањето на ковчегот беше поздравено со аплауз од илјадници луѓе пред и внатре во катедралата.
Миланскиот архиепископ Марио Делпини истакна дека Берлускони бил бизнисмен кој доживеал и успеси и неуспеси, политичар кој изгубил и победил, но и личност која имала обожаватели и клеветници, „оние кои му аплаудирале, но и оние кои го мразеле“, пренесува Асошиетед прес.
„Но, во овој момент на прошка и молитва, што можеме да кажеме за Силвио Берлускони? Тој беше човек желен за живот, љубов и радост. Тој е човек кој сега се среќава со Бога“, рече Делпини.
Ковчегот на Силвио Берлускони беше проследен со долги аплаузи од бројни јавни личности кои учествуваа на државниот погреб во катедралата, а пред ковчегот имаше слика од „насмеаниот витез“, како што пренесува Раи дека го нарекувале Берлускони.
Со громогласен и континуиран аплауз, со скандирања „Има само еден претседател“, го поздравија ковчегот на основачот на Форца Италија.
Покрај семејството и пријателите на Берлускони, на погребот присуствуваа и италијанската премиерка Џорџо Мелони, италијанскиот претседател Серџо Матарела, лидерот на Лигата Матео Салвини, италијанскиот министер за надворешни работи Антонио Тајани, како и поранешните премиери Матео Ренци, Паоло Џентилони и Марио Драги.
Поранешниот премиер на Италија и лидер на партијата Форца Италија, Силвио Берлускони денеска ќе биде кремиран во храмот Панта Реи во Валенсија, откако беше одржан државен погреб во Миланската катедрала, а според најавите на семејството, пепелта ќе се врати во Аркор каде ќе се чува во семејниот мавзолеј, пренесува Раи.
Берлускони првично го изградил мавзолејот за себе, за членовите на неговото семејство и пријателите, но дури подоцна дознал дека законот дозволува телата да се погребуваат само на јавни гробишта.
Сепак, пепелта може да се стави во мавзолеј.
Берлускони почина на 12 јуни во 9:30 часот во болница во Милано на 87-годишна возраст.