Грузиската полиција денеска соопшти дека уапсила десетици луѓе во обид да ги растера илјадниците проевропски демонстранти кои синоќа се собраа пред зградата на парламентот во Тбилиси деветти ден по ред демонстрирајќи против владата.
Безбедносните сили фрлија солзавец и водени топови кон демонстрантите кои бараа нови избори и враќање на евроинтеграциите.
„Полицијата приведе 48 демонстранти поради хулиганство и затоа што не ги почитувале полициските наредби“, се вели во соопштението на МВР.
Кавкаската нација е во превирања откако владејачката партија Грузиски сон ја објави својата победа на спорните избори на 26 октомври. Владата, која критичарите ја обвинуваат за лазечки авторитаризам и враќање на земјата кон Русија, минатата недела рече дека ќе ги прекине преговорите за пристапување во Европската унија, што предизвика нов бран протести.
Остриот одговор на властите предизвика гнев во земјава и се поголема и поостра меѓународна осуда. И покрај ова, владата одбива да се повлече.
Досега се приведени стотици демонстранти. Државниот народен правобранител ја обвини полицијата за „малтретирање“ на уапсените, а многумина се пожалија на малтретирање на полицијата, покажувајќи видливи повреди.
Протестите организирани синоќа беа главно мирни додека не се појави полицијата за безредијата, велат новинарите на АФП. Потоа дојде до тепачка и полициски апсења.
Министерството за внатрешни работи тврди дека властите ја растерале толпата откако „дејствата на некои луѓе на протестите добиле насилен карактер“, при што некои вербално малтретирале полицајци и фрлале со камења по нив.
Државниот правобранител Леван Јоселијани рече дека полицијата „нема правна основа да ги растера луѓето кои се собрале на мирен состанок“.
САД, Франција и Германија се меѓу западните земји кои го осудија задушувањето на протестите.
