Остануваат уште три дена до референдумот, на кој граѓаните ќе треба да се одлучат дали се за или против влез на Македонија во ЕУ и НАТО под име „Република Северна Македонија“.
Од граѓанската иницијатива „Зачекори напред“, секојдневно испраќаат пораки со цел да ги уверат граѓаните дека идентитетот не е загрозен со промена на името.
„Идентитетот ((lat.: identitas – еднаквост, истост) e внатрешна слика која еден човек или група ја имаат сами за себе, наспроти промените кои се случуваат во околината и општеството. Идентитетот е образец кој човекот или групата го изразуваат при однесувањето , комуникацијата со другите и при само-претставувањето, заокружувајќи го својот систем на вредности и верувања.
Националниот идентитет е само дел од лепезата идентитети кои нé формираат како комплетни личности. Врз целосното формирање на идентитетот влијаат мноштво особености како јазик, географски одлики, вера, обичаи, кујна, фолклор, традиција, и ред други одлики како раса, пол, возраст, политички убедувања, лични афинитети, семејството и личното опкружување, сé што ни овозможува да ја создадеме сликата за самите себе. Ниту еден договор или било каква промена од виша сила не може да го дефинира или промени идентитетот на поединецот бидејќи истиот претставува лична слика за тоа како се гледаме себеси и каде припаѓаме“, велат од иницијативата.
