Поради неисправности во производството што може да го оштетат моторот, „Хонда“ повлекува речиси 250.000 возила во САД, јавуваат западните медиуми.
Според известувањето што производителот на автомобили го поднесе до американската Национална управа за безбедност на сообраќајот на патиштата, дел од моторите на моделите „Акура“ и „Хонда“ може да предизвикаат „неправилно функционирање или застој на моторот во возење“, зголемувајќи ја така опасноста од пожар, судир и повреди.
Ова е 14-то повлекување автомобили на „Хонда“ оваа година и петто најголемо досега. Со тоа, бројот на „Хонда“ возила повлечени оваа 2023 година надмина три милиони.
Повлекувањето ги вклучува моделите „Акура Ти-ел-екс“ 2015-2020“ и „Ем-ди-екс 2016-2020“. Потенцијално засегнати се и „Хонда Одисеј“ од 2018. и 2019 година, „Пајлотс“ од 2016., 2018. и 2019., како и „Риџлајн“ произведени меѓу 2017. и 2019 година.
Од компанијата соопштија дека сопствениците ќе бидат известени со писмо на почетокот на јануари, по што следи проверка, поправка и заменување на моторите бесплатно.