„HBO“ го исклучи српскиот актер Милош Биковиќ од третата сезона на серијата „The White Lotus“ откако украинското Министерство за надворешни работи упати критика поради соработката со актер кој ја поддржува „Русија и геноцид“.
Откако претходно беше најавено дека Биковиќ ќе биде дел од новата сезона на серијата „The White Lotus“, се огласи „HBО“ и соопшти дека одлучиле да ја прекинат соработката со актерот поради контроверзиите околу Украина.
„Решивме да се разделиме со Милош Биковиќ и улогата ќе биде пренаменета“, изјавил портпаролот на продукциската куќа во соопштението.
Министерството за надворешни работи на Украина претходно упати остра критика, пишувајќи дека Биковиќ е личност која поддржува геноцид и го крши меѓународното право.
„Милош Биковиќ, српски актер кој ја поддржува Русија од почетокот на сеопфатната инвазија, сега треба да глуми во третата сезона на „The White Lotus“ на „HBO“. „HBO“, дали е во ред да работите со личност која поддржува геноцид и го прекршува меѓународното право?“, наведоа од Министерството.
Серијата не откри детали за ликот што требаше да го толкува, но се верува дека Биковиќ добил мала улога како Русинот Валентин, кокетен јоги и хотелски ментор за подобрување на животот.