Овој закон нема никаква врска со унапредувањето на човековите или јазичните права на Албанците во Македонија. Овој закон е step stone кон федерализација на државата, и тоа на секој што не страда од слепило предизвикано од политичка коректност, му е јасно.
Јанаки МИТРОВСКИ
Во Македонија свикнавме работите да се чинат обратно. Наместо во затвор каде што му е местото, Груевски мудрува од Пешта. Наместо разрешени, тефтер-судиите глумат увредени. Премиерот наместо да иницира разрешување на токму тефтер судиите, ја замајува јавноста пред избори со ветинг. Така е и со Законот за јазиците. Наместо пред истиот да се изгласа да се прати до Венецијанската комисија, тоа се чини post festum. И види чудо, Венецијанската комисија да не ти била наш државен орган наполнет со партиски кадри, на какви што свикнал Бујар Османи, па нашле серија забелешки на веќе изгласаното законско решение.
Но, за почеток малку историја. Сите се сеќаваме како премиерот Заев, во улога на тогашен лидер на опозицијата, се колнеше дека нема да има двојазичност на целата територија. Се спомнуваа жички, божји заклетви и преданија, ген и што ти ја знам. Не се испушти и да се обвини ДПМНЕ дека ја фабрикува приказната со двојазичноста и дека сѐ е во „главите на вмровците“. Иако ДПМНЕ имаше успешна предизборна кампања на оваа тема, кај слободномислечките граѓани преовлада мислењето дека се работи за валкан спин, особено имајќи ги предвид околностите.
ДВОЈАЗИЧНА ДРЖАВА
Година и пол подоцна, од главите на вмровците ова стана реалност. Во меѓувреме, жичката на премиерот се скина, генот исчезна, а Бог како да се покаја што го црпна Заев од Муртино ѝ ни го насади на Илинденска без број. На подмолен начин, без никаков општествен или политички консензус, фаворизирајќи исклучиво една етничка заедница беше донесен Законот за јазиците, кој de facto и jure ја направија Македонија двојазична држава.
Овој закон нема никаква врска со унапредување на човековите или јазичните права на Албанците во Македонија. Овој закон е step stone кон федерализација на државата, и тоа на секој што не страда од слепило предизвикано од политичка коректност, му е јасно. Каква е реалната потреба катастарско одделение Берово да издава документи на албански јазик? Кој има нужда решенијата на Центaрот за социјални работи во Виница да бидат двојазични?
„Високо огромни и скапи обврски што законот ги наметнува особено на судските органи се придружени со тешки парични санкции во случај на непочитување (член 23). Покрај тоа, неуспехот да се обезбеди превод и толкување што се бара со закон во текот на постапката претставува основа за враќање на судската одлука (член 9 (5)). Под сегашни околности, доколку се применува целосно Законот, тој значително ќе го забави функционирањето на целиот судски систем, со што ќе се доведе во опасност сериозно нарушување на правото на фер судење загарантирано со Европската конвенција за човекови права“.
Ова не го велам јас, не го вели опозицијата или некој напален македонски националист, ова го вели тим од ВРВНИ експерти на кои не може да им се јави претседателот на партијата и да им наредува како да одлучуваат. Делумно и јас и останати правници кои не сме вoвлечени во дупето на политичка партија алармиравме во делот на судските постапки и проблемите кои овој закон ќе ги донесе, но владејачката партија перфидно изигра и интенционално прво го изгласа законот, па го прати до Венецијанската комисија. Во СДСМ, ниту се глупи, ниту наивни и многу добро знаеја дека обратниот процес е тешко изводлив и дека ДУИ и албанските партии имаат милион начини да ги блокираат измените на овој закон што ги бара и самата Комисија.
Затоа тврдам дека процесот е намерно обратно изведен, ем на СДСМ да му донесе мир во куќа со ДУИ (овој закон е веројатно еден од главните услови за коалицијата ДУИ-СДСМ), но и алиби пред македонското гласачко тело – ете ние сакаме да ги спроведеме препораките, ама од ДУИ нѐ блокираат. Оваа провидна игра на СДСМ ќе му се удри на глава на наредните избори, бидејќи продолжуваат со потценувачкиот однос на гласачкото тело.
МАКЕДОНИЈА НЕ Е ШВАЈЦАРИЈА
Секој што видел минимум квантитет судења, ЗНАЕ дека овој закон е неприменлив во пракса, тука говорам во делот на неговата употреба во судските постапки. Тие, ќе се одолжуваат непотребно, но и тоа да го тргнеме настрана, едноставно е неизводливо да го применувате доследно. Како си го замислил ова законодавецот, на секое судење да има симултан превод? За финансискиот дел нема да дадам осврт, бидејќи тоа е една од ретките нешта за кои се согласувам со Груби, дека унапредувањето на правата не треба да зависи од финансии. Но, овде јазичните права се последното нешто кое го носи овој закон.
Но, кога сме кај јазичните права, би било добро Груби, Османи или кој било друг функционер на ДУИ, кои живеат исклучиво од националистичка политика или реторика, да ни појаснат како тоа е унапредување на јазичните права да се воведе законска обврска и високи петилјадни евра казни за непознавање на албанскиот јазик, но не предвидува исти такви санкции за непознавање на македонскиот јазик? Тоа ли е рецептот за соживот од кујната на ДУИ?
Истата партија се противеше и блокираше измени во закон со кои децата од албанска етничка припадност, како во секоја нормална држава, ќе учат македонски јазик од прво одделение, наместо од петто, како досега, со образложение дека тоа било „асимилизација“. Ве молам, асимилизација било да го знаеш јазикот на државата. Прилично сум убеден дека македонските Албанци, но и самите Македонци кога емигрираат да речеме во Швајцарија, ни на крај на умот не им доаѓа таму да поставуваат вакви нереални јазични барања, туку го изучуваат германскиот, францускиот или италијанскиот јазик како попчиња, во зависност од тоа во кој кантон живеат. Но, Македонија не е Швајцарија.
Оваа година, во септември се запишав на курс по албански јазик кај феноменалниот mësues (учител) Владимир Марковиќ. Јас не чекав никој да ми наметне законска обврска или учењето да ми го субвенционира. Сам си платив семестар и запишав почетен курс по албански јазик. Нема збор, исклучително тежок јазик, но со добар ментор сѐ се надминува и сметам дека за две години ќе имам познавања доволно колку да се разберам. Јас немам ништо против ничиј јазик. Мојот мајчин, влашки јазик е во изумирање и оттаму сум супер сензитивен на темата јазик. Но, на овој закон целта му е да го отпочне процесот на федерализација на државата, и тоа сите го знаеме!
Бујар Османи нормално не испушти суптилно да се закани со војна доколку препораките се преточат во законски измени. Не знам за вас, но мене прилично ми здодеа да живеам во страв од пушката на ДУИ, завиткана во обландата на Османи!!!