Германскиот пратеник кој вршел услуги за ВМРО-ДПМНЕ, на чело на фирма со лиценца за одгледување канабис во Македонија

Цех, кој го загубил пратеничкото место во Бундестагот есента 2017, во 2018 година ја ликвидирал фирмата за пиар-консалтинг. Во мај 2020 тој повторно стана пратеник откако негова колешка си даде оставка, а во тој период тој веќе е влезен во нов бизнис – одгледување канабис.

-Денес 39-годишниот политичар е на чело на Управниот одбор на компанијата „Фарм кан“ (PharmCann Deutschland AG) и со неа е тесно поврзан со одгледување канабис во Северна Македонија. Партнер на Цех во Скопје му е Златко Кесковски, поранешен заменик-директор на УБК и шеф на обезбедувањето на експретседателот Борис Трајковски. Кесковски е шеф на Надзорниот одбор на „Фарм кан Германија“ и има лиценца за одгледување канабис во Северна Македонија, пренесува „Дојче веле“.

За ова, Цех изјавил дека целта е да се изгради продажна мрежа за Германија.

Во врска со релациите со Груевски, пак, како што објави „Шпигел“, Цех во текот на 2016 и 2017 година во повеќе наврати се среќавал со него и тогашното раководство.

Сега згаснатата фирма за консултантски услуги, тој ја формирал во април 2016 година, а неколку месеци подоцна веќе имал договор пиар-консалтинг со ВМРО-ДПМНЕ и 50 000 евра на своето конто.

Фирмата на Цех, пренесува „Дојче веле“, никогаш не објавила дека работела за ВМРО-ДПМНЕ, иако нејзиното име стоело и на интернет-страницата на Цех во Бундестагот. Тој немал законска обврска да објави кои му биле муштериите и со кого сѐ работел.