Германија ја прогласи речиси цела Шпанија за ризичен регион

Германија ја прогласи речиси цела Шпанија, вклучувајќи го и туристичкиот остров Мајорка, за регион под ризик од корона вирус по зголемувањето на случаи на заразени.

Тој потег е удар врз надежите дека брзото закрепнување на масовниот туризам по неколкумесечна пауза ќе го запре ширењето на вирусот, пишува „Гардијан“.

Германскиот весник „Билд“ претходно објави дека Мајорка е додадена на списокот со високоризични региони објавен од Институтот за јавно здравје Роберт Кох.

Тоа значи дека луѓето кои се враќаат од тие области ги чека тест за корона вирусот и/ или двонеделен задолжителен карантин.

Бројот на случаи во Шпанија се зголеми во последните денови откако блокадата на земјата беше укината пред седум недели.