Патниците на германските аеродроми денеска се соочија со огромни проблеми, кога 24-часовниот генерален штрајк на аеродромските работници доведе до откажување на повеќе од 3.500 летови и значително нарушување на воздушниот сообраќај.
Околу 560.000 патници беа погодени од штрајкот што го организираше синдикатот Верди како дел од барањата за повисоки плати и подобри услови за работа.
Штрајкот зафати 13 аеродроми низ Германија, вклучувајќи ги Франкфурт, Минхен, Берлин и Хамбург, а откажани летови се регистрирани и во Келн, Дизелдорф, Штутгарт, Хановер, Дортмунд, Лајпциг и Бремен.
На аеродромот во Франкфурт, најголемиот во Германија, откажани се 1.050 од 1.116 планирани летови, додека аеродромот во Берлин целосно ги прекина летовите. Аеродромите во Хамбург и Келн/Бон немаа редовен патнички сообраќај, додека Минхен ги предупреди патниците на значително намален распоред на летови.
Синдикатот Верди го најави штрајкот веќе во петокот, но вработените на аеродромот во Хамбург дополнително го проширија протестот со прекин на работата еден ден порано, откажувајќи речиси 300 летови веќе во неделата.
