Момците од Галакси Бенд, музичари кои изминативе години се редовни на речиси сите семејни забави во Тиквешијата, ќе ги забавуваат присутните на градскиот плоштад во Кавадарци за време на организираниот новогодишен дочек.
Станува збор за музичка група која е присутна на сцената околу една деценија, и има богат репертоар. Фронтменот на Галакси Бенд, Васко Мелов кој е дипломиран музичар не крие дека секогаш се прилагодуваат според музичкиот вкус на гостите, па изведуваат од стари традиционални песни, се до рок и џез нумери. Со богата програма која ќе започне утре, во сабота, со детскиот хор кој ќе настапи со новогодишни песни, во Кавадарци стартува одбележувањето на празниците.
Во текот на целата недела се најавени културно-забавни настани, како презентација на кавадаречки маџун, пристигање на Дедо Мраз, дарување на новогодишни пакетчиња, детски изложбени работилници, настапи на балетски студиа и фолклорни ансамбли… За новогодишниот дочек, во петок, покрај настапот на Галакси Бенд, за присутните се подготвува и спектакуларен огномет.
Во Тиквешијата единствено во Кавадарци ќе има организирана забава, па голем број на жители на Неготино, Демир Капија и Росоман ќе ја дочекаат новата година на кавадаречкиот плоштад.
Вики Клинчарова