Трите главни руски новински агенции, повикувајќи се на безбедносната служба ФСБ, наведуваат дека истрагата за кривично дело против бунтовниците на Вагнер е затворена.
Новинската агенција Ројтерс, повикувајќи се на агенцијата РИА, наведува дека случајот е отфрлен бидејќи „учесниците престанале со акции директно насочени кон извршување на кривичното дело“.
Во текот на истрагата за случајот немири, беше утврдено дека неговите учесници ги прекинале своите дејствија директно насочени кон извршување на кривичното дело, па случајот е затворен, соопшти ФСБ.
„Во текот на истрагата за кривичниот случај покренат на 23 јуни од страна на истражниот оддел на ФСБ на Руската Федерација според член 279 од Кривичниот законик на Руската Федерација за фактот на вооружен бунт, беше утврдено дека на 24 јуни, учесниците престанаа со дејствија директно насочени кон извршување на кривично дело. Имајќи ги предвид овие и други околности од значење за истрагата, истражниот орган на 27 јуни донесе решение за затворање на кривичното дело“, соопшти Службата за безбедност, пренесува РИА Новости.
Во саботата навечер во Ростов на Дон, штабот на Јужниот воен округ беше окупиран од паравоената формација Вагнер. Ова се случи по изјавите на Евгениј Пригожин за наводните ракетни и бомбашки напади на руските вооружени сили врз камповите на Вагнер, кои беа демантирани и од Министерството за одбрана на Русија и од ФСБ.
