Претседателката на Европската комисија Урсула фон дер Лајен денеска изјави дека „нема сомневање“ дека Украина еден ден ќе се приклучи на Европската унија.
„Украинците ни кажуваат, кога ја замислуваат својата иднина, го гледаат европското знаме како се вее над нивните градови. Не се сомневам дека Украина ќе биде дел од нашата Унија“, рече Фон дер Лајен во Лондон на конференцијата за обнова на Украина.
Фон дер Лајен, исто така, истакна дека Киев ја забрзал својата програма за реформи со „импресивна брзина и одлучност“.
На истата конференција, германската министерка за надворешни работи Аналена Бербок изјави дека обновата на Украина мора да биде тесно поврзана со процесот на пристапување во ЕУ.
„Сепак, пред сè, на долг рок, сакаме да помогнеме во поставувањето на темелите за процут на украинската економија, погодна за иднината преку процесот на пристапување во ЕУ“, рече Бербок.
