„Фокус“, поточно уредничката Јадранка Костова и новинарот Владо Апостолов го „добија“ екс директорот на УБК, Сашо Мијалков, во Судот за човекови права во Стразбур. Апликацијата беше поднесена во 2016 година, откако пред домашните судови, весникот и новинарите беа осудени за клевета и навреда на тогашниот директор на УБК, за што му платија штета од над 9.000 евра.
Текстовите беа објавени во сега згаснатиот дневен весник „Фокус“, каде што беа пренесени изјави од поранешниот амбасадор на Чешка Игор Илиевски, кој тврдеше дека бегал од Чешка поради притисоците од Мијалков.
-Судот смета дека оспорените одлуки претставувале мешање во правото на апликантите на слобода на изразување. Случајот се однесува на жалбата на апликантите според член 10 од Конвенцијата, дека исходот од граѓанската постапка за клевета против нив го повредил нивното право на слобода на изразување, се наведува во одлуката на Судот, потенцирајќи дека бил повреден членот 10 од Конвенцијата.
Во одлуката се појаснува дека новинарот и медиумот пишувале за прашања од јавен интерес, поврзани со шефот на тајната полиција, а кои можеле да придонесат во јавната дебата.
-Судот се согласува со Владата дека предметните написи содржеле изјави за фактите подложни на докажување. Иако сите фактички наводи во суштина се состоеле од упатувања на „приказни“ или „гласини“, како што утврдиле домашните судови, судовите не успеале да го одмерат фактот дека тие не произлегле од жалителите. Делумно, апликантите известувале само за она што го раскажува г-дин Илиевски, кој им пристапил и им доставил свој писмен извештај за настаните врз основа на неговото лично искуство. Во написите, апликантите јасно ги идентификуваа изјавите што произлегуваат од г-дин Илиевски. Покрај тоа, во оспорената постапка не беше утврдено дека објавената содржина е целосно невистинита или само измислена, се наведува во пресудата.
На тужителите им е одредена нематеријална штета од 3.000 евра.
Над 9 илјади евра, пак, изнесуваше оштетата што „Фокус“ му ја плати на директорот на Управата за безбедност и контраразнување Сашо Мијалков за нарушен углед.
Текстовите беа објавени во сега згаснатиот дневен весник „Фокус“, каде што беа пренесени изјави од поранешниот амбасадор на Чешка Игор Илиевски, кој тврдеше дека бегал од Чешка поради притисоците од Мијалков. Иако неколку пати беше побарано, Мијалков не одговараше на прашањата на „Фокус“ во кои се бараше негов коментар за обвинувањата.
