Министерот за здравство Венко Филипче реагираше поради, како што рече, еклатантното прекршување на протоколите на концертот на Петар Грашо во Хераклеа во Битола.
„Комисијата за заразни болести и јас лично во текот на јуни имав неколку средби со организаторите на настани на кои заедно ги утврдивме сега веќе усвоените протоколи, а според кои меѓу другото, настаните се одржуваат единствено на отворено, со максимум 50 отсто публика од предвидениот капацитет, задолжителна дистанца меѓу посетителите од 1,5 м, задолжително носење на маска и дезинфекција на раце и мерење на температура на влез за секој посетител. Организаторот на настанот е должен да обезбеди задолжително присуство на редарска служба која ќе го контролира спроведувањето на протоколите и наведените мерки, со право да го отстрани секој посетител кој истите нема да ги почитува“, напиша тој на фејсбук.
Филипче додаде дека колективното здравје е заедничка одговорност, која, според него, во овој случај треба да ја понесе организаторот на настанот.
