Имунитетот од вакцината штити многу повеќе од прележана болест, порача вечерва министерот за здравство Венко Филипче во интервју на ТВ Канал 5 објаснувајќи ја мерката со којашто се ограничува движењето на лицата кои прележале ковид.
-Препораките кои ги комуницирам во јавноста преку алатките на Министерството за здравство се должат на препораките на сознанијата на стручни лица, а тоа се имунолози кои што работат со вакцина, фармаколози, професори на фармацевскиот факултет и од тука се препораките. Има една студија која што вели дека оние кои се вакцинирани можат да заболат со ризик од 0,07 проценти, а 1,2 отсто од прележаните можат да заболат. Што значи дека кај нив е поголем ризикот и од тука таа препорака за што кратко време од прележувањето, а тоа е после месец дена и дополнителни две недели да се организира севкупниот процес е нешто што на граѓаните дополнително им го штити здравјето, појасни Филипче.
Тој информираше и за една препорака на Американскиот центар CDC која вели дека може да се прими вакцина после десет дена од направениот тест кај асимптоматки пациенти.
Министерот нагласи дека сите сериозни студии на големи испитаници одат во насока на тоа и дека тоа се ставови на Светската здравствена организација дека што порано се прими вакцина, дополнително го штити здравјето.