Грчката европратеничка Ева Каили ќе биде задржана во притвор уште еден месец, по денешна одлука на суд во Белгија.
Поранешната потпретседателка на Европскиот парламент е осомничена дека била во центарот на еден од најголемите корупциски скандали во Европската унија, а нејзините адвокати побараа да биде ослободена и да носи полициски уред за следење.
Сепак, по рочиштето, судот соопшти дека го „продолжува притворот” за уште еден месец.
Адвокатите на Каили сега имаат 24 часа да ја обжалат таа одлука и доколку одлучат да го сторат тоа, Каили ќе се појави пред Апелациски суд во Брисел во рок од 15 дена.
Белгиското обвинителство ја обвинува Ева Каили за корупција, членство во криминална организација и перење пари. Таа е во притвор од 9 декември, додека нејзиниот партнер Франческо Џорџи, советник во Европскиот парламент, исто така е во притвор поради истите обвиненија.