ЕУ очекува зголемен број на баратели на азил

Шефицата на Агенцијата за азил на ЕУ, Нина Грегори, изјави дека очекува во Унијата континуирано да расте бројот барања за азил.

„Прилично е јасно дека во догледна иднина ќе се бележи зголемен број барања“, рече Грегори, директорката на Агенцијата за азил на Европската унија (EUAA) во интервју за германската медиумска групација „Функе“.

Нестабилноста и заканите за човековата безбедност беа карактеристики на денешниот свет, рече таа, изразувајќи жалење што таквите појави не се привремени.

„Геополитичките случувања во последните две години имаа директно влијание врз потребата од меѓународна заштита, што доведе до зголемено раселување во земјите на ЕУ“, рече Грегори.