Истрагата за предметот „Рекет“ мрдна од мртва точка откако обвинителите се вратија од одмор. Деновиве е раздвижено во Обвинителството за организиран криминал и корупција, кое го води обвинителката, Вилма Русковска. До сега исказ дадоа обвинителките Елизабета Јосифовска и Лиле Стефанова, а денеска сведочи и обвинителот, Бурим Рустеми.
Рустеми го води предметот „Поштенска банка“, за кој исто така постојат сомневања дека е користен за да се изнуди рекет од осомничени во предметот. Со неговиот исказ и со исказот на Стефанова, Обвинителството на Русковска ги комплетира доказите кои ги има против инволвирани во аферата. Меѓу нив се споменува и името на специјалната јавна обвинителка, Катица Јанева.
Дали Јанева ќе добие статус на осомничена, се уште не се знае, но од Обвинителството потврдуваат дека истрагата ќе биде проширена на нови лица.
-Веројатно ќе се прошири, но спрема колку лица во овој момент не може да се каже, неопходно е да се направи сумблимат на изведените докази и оние што следните денови ќе бидат изведени – велат од Обвинителство за „Фокус“.
Во меѓу време зоврива ситуацијата во Специјалното јавно обвинителство. Обвинителите веќе покажуваат отворена нетрпеливост кон Јанева и незадоволство од нивната шефица, која го урнисува кредибилитетот на институцијата. Последниот инцидент каде обвинителката Фатиме Фетаи плукнала кон камерата во СЈО и употребила пцовка, од револт што е претресувана на нејзиното работно место, укажува дека на Јанева повеќе никој не и го чува грбот. Нејзините постапки, пак, покажуваат дека и таа повеќе нема доверба во обвинителите.
Друго прашање што се поставува деновиве е каде ќе не однесе истрагата за случајот „Рекет“. Се појавија информации дека криминалните активности на осомничените ја преминале границата со Србија и дека во мрежата како посредник учествувал и српски државјанин. Наводно во Србија бил исплатен рекет од 400.000 евра, кои ги дал осомничен во предметот „Базни станици“ на СЈО.
Сепак, засега од македонското обвинителство не е побарана меѓународна помош.
-Од досега обезбедените докази нема сознанија за вмешаност во конкретниот случај на странски државјанин – велат од Обвинителство.
Се очекува истрагата да добие појасна слика следната недела кога Јанева треба да одговори на поканата за распит.
М.В.