Украина и Молдавија ги исполнуваат сите критериуми потребни за формален почеток на преговорите за членство во ЕУ, соопшти денеска Европската комисија, откако украинскиот премиер Денис Шмихаљ изјави дека преговорите би можеле да започнат кон крајот на овој месец.
„Одлуката сега е во рацете на земјите-членки, на нив е да ја усвојат преговарачката рамка. Откако ќе се преземе овој чекор, привилегија на претседавањето со ЕУ е да свика меѓувладина конференција за официјално да го означи почетокот на преговорите“, изјави портпаролката за проширување на Европската комисија – Ана Писонеро.
За оценката на Комисијата дополнително ќе разговараат експерти во работни групи, а следната недела ќе разговараат и амбасадори на владите на ЕУ.
Сите земји-членки на ЕУ мора едногласно да се согласат за почеток на преговорите, а Белгија, која претседава со ЕУ до крајот на јуни, прави договори меѓувладините конференции со Украина и Молдавија да се одржат на 25 јуни во Луксембург, доколку има едногласна поддршка.
Поддршката на сите 27 земји од ЕУ не е загарантирана бидејќи Унгарија, која одржува топли врски со Русија и ја критикуваше кандидатурата на Украина за членство, се сомнева во оценката на Комисијата дека Украина е подготвена и сака да види некои други точки во преговарачката рамка, пренесува Ројтерс.
Белгија и Комисијата сакаат да постигнат договор во јуни, пред Унгарија да го преземе шестмесечното ротирачко претседателство на 1 јули, бидејќи дипломатите на ЕУ очекуваат Будимпешта да го одложи целиот процес до 2025 година.
Киев аплицираше за членство во ЕУ неколку недели по руската инвазија во февруари 2022 година и доби кандидатски статус четири месеци подоцна.
И покрај ефектите од војната, која ја уништи економијата и принуди милиони да ги напуштат своите домови, украинската влада спроведува сеопфатни реформи препорачани од ЕУ, вклучително и воведување антикорупциски мерки и регулативи за јавната администрација и безбедноста на храната, пишува Британска агенција.
