Од вкупно запишаните 4 514 гласачи на седумте избирачки места на кои денеска има прегласување за парламентарните избори, според Државната изборна комисија, до 15 часот гласале 1 574 избирачи или излезеноста е 34,87 отсто.
До 15 часот најголема е излезеноста на избирачкото место 2101 во тетовско Желино во шестата изборна единица, каде што гласале 428 избирачи или 43,10 отсто.
По него е избирачкото место 1194 во Општина Крушево, каде своето право на глас го искористиле 42 отсто од избирачите. Во второто избирачко место во Општина Крушево, каде денеска има прегласување, по пресекот во 15 часот на гласање излегле 67 избирачи или 22,48 отсто.
Во избирачкото место 1844 во Општина Струга, во петтата изборна единица, своето право на глас по пресeкот во 15 часот го искористиле 39,71 отсто од избирачите.
Во Охрид на избирачкото место 1272, до 15 часот, гласале 226 избирачи или 31,79 отсто.
На двете избирачки места во Општина Долнени излезеноста по пресекот во 15 часот е 27,67 отсто.
На избирачкото место 1470/1 гласале 184 избирачи, а на избирачкото место 1470 своето право на глас до 15 часот го искористиле 173 избирачи.
Споредено со гласањето на 8 мај, од ДИК велат дека на ова прегласување се забележува зголемена излезеност за 1,21 проценти на овие избирачки места.
Државната изборна комисија, по пресекот од излезеноста до 11 часот, информираа дека до неа се пристигнати два приговори за заштита на личното избирачко право за избирачкото место 1470 во Долнени.
Прегласувањето денеска се одвива на шест избирачки места во петтата изборна единица, а на едно во шестата изборна единица.