Американскиот фармацевтски гигант „Џонсон и Џонсон“ (J&J) соопшти дека ќе издвои 8,9 милијарди долари за да се спогоди со тужителите кои тврдат дека поради азбестот во неговиот талк заболеле од рак.
Компанијата соопшти дека нејзината подружница LTL Management LLC повторно поднела барање за заштита на доверителите за да добие судско одобрение за план за деловна реорганизација што ќе ги реши сите побарувања од парницата за пудрата на база на талк.
Тужителите тврдат дека поради употреба на талк добиле рак на репродуктивните органи и мезотелиом.
Компанијата тврдеше дека нејзината пудра за бебиња и други производи од талк се безбедни, не предизвикуваат рак и не содржат азбест. „Џонсон и Џонсон“ во 2020 година соопшти дека ќе престане да продава детска пудра од талк во САД и Канада поради, како што рече, „дезинформации“ за производот, а потоа објави дека ќе го повлече од пазарот ширум светот во 2023 година.