Лидерите на Кина и Северна Кореја ветија денеска подобрување на билатералната соработка на 75-годишнината од дипломатските односи меѓу двете земји, јави државната новинска агенција на Пјонгјанг KCNA.
„Му придавам големо значење на развојот на односите меѓу Кина и Северна Кореја“, рече кинескиот претседател Си Џинпинг во пораката до севернокорејскиот лидер Ким Џонг Ун, користејќи ја кратенката за официјалното име на Северна Кореја, Демократска Народна Република Кореја.
Си Џинпинг рече дека Кина е подготвена да продолжи да „пишува ново поглавје“ во односите преку зајакнување на комуникацијата и соработката.
Кина е најголемиот трговски партнер на Северна Кореја. Двете земји споделуваат историја која потекнува од поддршката на Пекинг за Пјонгјанг за време на Корејската војна 1950-1953 година, што резултираше со формирање на Северна и Јужна Кореја.
Кина реагираше претпазливо во јуни кога Ким Џонг Ун ги продлабочи врските со рускиот претседател Владимир Путин. Оваа година Северна Кореја и Русија потпишаа стратешки договор кој вклучува елементи на заемна одбрана.
Во пораката упатена до Си Џинпинг, Ким Џонг Ун вети дека „постојано ќе се труди да ги зајакне и развива пријателските и кооперативни односи меѓу КНДР и Кина како што бара новата ера“.
Се очекува Северна Кореја да го ревидира својот устав за да се откаже од својата долгогодишна цел за мирно обединување со Јужна Кореја и да ја редефинира меѓукорејската граница. Експертите велат дека овој потег може да ги зголеми тензиите на полуостровот. Северна Кореја во понеделник ќе свика парламентарна седница на која ќе се расправа за амандманот.