Деветмина гостиварци се затруле со храна, јаделе во ист ресторан

Деветмина луѓе синоќа биле примени во гостиварската болница на Инфективното одделение со симптоми на труење.

Станува збор за помлади пациенти кои се жалеле доцна во ноќта на повраќање, дијареа и изнемоштеност.

Од болницата велат дека по дадената терапија, сите се испратени дома и нема потешки случаи.

Според првичните информации, лицата се затруле од храна во еден ист угостителски објект во градот.

Епидемиолошката служба на Центарот за јавно здравје ги презела сите мерки – земени се примероци за анализа, по што ќе се знаат причините кои довеле до влошување на здравствената состојба на пациентите и дали станува збор за бактериолошка инфекција.