Францускиот предлог за нацрт-заклучоците на Советот се однесува на билатерален протокол потпишан меѓу Скопје и Софија, кој јасно ги опишува условите и конкретните чекори за почеток на преговорите за членство на Република Северна Македонија во ЕУ, објави попладнево БГНЕС заедно со детали од самиот протокол.
Заедно со гаранциите за негова имплементација и самата преговарачка рамка, овој протокол е од клучно значење за Софија, која мора внимателно да процени дали неговата содржина ги исполнува условите на сегашната официјална бугарска позиција опишана во Рамковната позиција за 2019 година, јави известувачот на БГНЕС.
Потпишувањето на таков документ ја покажува и подготвеноста на Скопје да ги исполни основните бугарски услови, како и да се заложи за нивно почитување во текот на целиот преговарачки процес во иднина.
Според БГНЕС, во прашање е всушност записникот од Вториот состанок на Мешовитата меѓувладина комисија, формиран врз основа на член 12 од Договорот за пријателство, добрососедство и соработка меѓу Република Бугарија и Република Северна Македонија од јуни оваа година.
Тој го оценува она што двете влади го направиле досега и ги поставува насоките за понатамошни обврски и активности. Во делот што ги отсликува достигнувањата, впечатлива е незадоволителната оценка за работата на Заедничката историска комисија, при што се споменува експлицитниот, но мал напредок постигнат во однос на цар Самуил и богомилството.
Делот што ги одразува насоките за следење е, всушност, клучен бидејќи ги поставува конкретните услови што Македонија мора да ги прифати за да го укине бугарското вето.
Овој дел е поделен во две фази, првата предвидува што треба да се случи непосредно пред првата меѓувладина конференција и втората: дополнителните услови за свикување на втора меѓувладина конференција. Главното место меѓу нив го зазема внесувањето на Бугарите во Уставот на Македонија.
Дополнително, се потврдува заложбата на Скопје за немешање во внатрешните работи на Бугарија, што практично значи откажување од македонско малцинство во Бугарија.
Во документот се предвидува историските личности за кои Заедничката историска комисија веќе постигнала компромис да бидат објавени и прифатени за заеднички прослави со приложен календар за 2022 и 2023 година.
Комисијата за последните четири години од својата работа констатирала договор за св. Свети Кирил и Методиј, Св. Климент Охридски, Св. Наум и Цар Самоил.
Од нив, во записникот експлицитно е споменат само цар Самоил, а предвидено е да се заменат натписите на неговите споменици во Македонија и конкретно на тврдината во Охрид, согласно формулата договорена од Мешовитата историска комисија. Предвидена е и непосредна измена на лекцијата посветен на Цар Самуил во наставната програма за VII одделение на македонските училишта, согласно постигнатата компромисна формула.
Историската комисија се уште нема јавно објавено што е договорено за Цар Самоил и во која насока е компромисната формула.
Истовремено, во текстот на протоколот не се вклучени историските теми „Гоце Делчев“, „Илинденско востание“ и „ВМРО“ експлицитно спомнати во Рамковниот став на Бугарија, кои се всушност навистина спорните теми меѓу двете национални историографии.