Министерот за здравство Илир Демири на денешната прес-конференција зборуваше за проблемот со хируршките сали на Клиничкиот центар во Скопје.
Рече дека салите се градени пред 30 години и тогаш била поставена инсталацијата за снабдување со кислород.
„Точно 30 години е компресорската станица. Пред месец дена имаше хаварија во станицата кога се расипа еден од компресорите и доведе до оштетување и влезе масло во тие цевки, по што компресорот е надвор од употреба. Клиниката за хирургија функционираше со два компресори кои поминаа технички преглед од две независни институции“ рече Демири.
Додаде дека побарал од менаџерите на Центарот да поднесат барање, за да можат да се сервисираат компресорите.
„Пред девет дена се случи истиот проблем и се појавува лоша миризба во мрежата на кислород и компромиран воздух. Повторно ги повикавме независните фирми кои спроведоа испитување. Бидејќи во Македонија нема лиценцирана лабораторија која може да даде дозвола или уверение кое ќе послужи за квалитетот за испорачаните гасови, побаравме од странска компанија и денес се испратени мостри во Германија. Од двете независни компании со лаборатории не виделе никаков недостаток во квалитетот на гасови и препорачаа да се менуваат филтрите од компресорките станици, појасни министерот.
Тој додаде дека постигнале договор за алтернативно решение, да се оперираат само итни случаи, односно дистрибуцијата на пациенти да биде за неврохируршки потреби во Градската болница, додека за другите интервенции во болницата „8-ми Септември“. Министерот истакна и дека набавени се шест компресори и можат да послужат за итни и неодложени интервенции и за пациентите кои се на КАРИЛ.
Министерството за здравство побара од Обвинителството да спроведе истрага и да се пронајде причината за проблемот кој предизвика хаос и огромни гужви во ГОБ „8 Септември“ и во болницата „Св. Наум Охридски“ . „Додека не заврши испитувањето од Германија и не дојдат анализите, Клиничкиот центар ќе се послужи со надворешни компресори, посочи Демири.