Од Делегацијата на Европската Унија очекуваат брза разрешница на насилството врз персоналот во М-НАВ, како и државните власти брзо да ги истражат наводите за пристрасност во вработувањата во Македонска навигација.
Оттаму велат дека со загриженост ги следат случувањата во врска со националниот давател на услуги за воздушна навигација М-НАВ и дека императив е именувањата во националниот давател на услуги за воздухопловна навигација и поврзаните услуги, исто како што треба да важи и за другите институции, да се засноваат на заслуги, квалификации и искуство.
Од Делегацијата потсетуваат дека државата се обврзала да го имплементира законодавството на ЕУ што се однесува на давателите на услуги за воздушна навигација (АНСПС).
„Ова вклучува одредби со цел за да се обезбеди независност на давателите на услуги за воздушна навигација (АНСПС) од државата, дека персоналот – особено контролорите на летање – ги исполнуваат законските барања за такви работни места и дека обезбедувањето на услугата ги почитува целите во однос на безбедноста, економичноста, капацитетот и животната средина“.