Турската лира денеска се спушти на најниски ниво, вклучително и за првпат ја помина границата од 20 лири за едно евро, откако претседателот Таип Ердоган ја удвои својата неортодоксна политика за ниски стапки повикувајќи се на исламската доктрина за лихварство.
Притисокот на претседателот за за намалување на каматните стапки за 500 базични поени од септември ја предизвика најтешката валутна криза во Турција во последните две децении, при што лирата падна за 35 отсто во последните 30 дена.
Валутата падна на дури 17,7540 за долар, што е историски најниско ниво.
Протестите во 2013 година
Ердоган ја бранеше својата економска политика во неделата и ја спореди нестабилноста на валутите со нападите врз економијата на земјата, кои влечат корени од националните протести во 2013 година, кои започнаа во паркот Гези во Истанбул.
-Ги намалуваме каматните стапки. Не очекувајте ништо друго од мене. Како муслиман, што и да бара (исламското учење) ќе продолжам да го правам тоа, рече тој, мислејќи на исламските финансии во кои високите камати, или лихварството, обично се избегнуваат.
И покрај широко распространетите критики и брзите последици за економијата – вклучително и брзото намалување на приходите и заштедите на Турците – Ердоган оди напред со својата таканаречена нова економска програма која дава приоритет на извозот и кредитирањето.
Црвено знаме за инвеститорите и штедачите.
Под притисок на претседателот, централната банка минатата недела повторно ги намали стапките за 100 поени, испраќајќи ги реалните стапки подлабоко во негативна територија, црвено знаме за инвеститорите и штедачите.
Последниот говор на Ердоган е повеќе потврда за неговиот план „но, исто така, сугерира дека ќе се заложи за повеќе намалувања на стапките“, вели Киеран Кертис, менаџер на портфолио во Абердин стандард инвестментс.
„Мислам дека многу инвеститори сега гледаат на 2023 година и на изборите како на време кога Турција повторно ќе почне потенцијално да станува интересна“.
Инфлацијата скокна на 21% минатиот месец и се очекува да помине 30% следната година. Економистите и опозициските пратеници велат дека брзото монетарно олабавување е непромислено и дека ги зголеми цените на увозот.
Во обид да ја забави продажбата и да се справи со, како што рече, „нездравите“ цени, централната банка интервенираше пет пати овој месец. Пресметките на банкарите покажуваат дека продала повеќе од 6 милијарди долари од веќе исцрпените девизни резерви.