Дадо Топиќ изразил желба, наградата и одбележувањето на големиот јубилеј- 60 години професионална работа, да се случи токму на „Охрид фест“ кој ќе се одржи на крајот на месецов.
Како што појаснуваат од организацијата на фестивалот, причина била големата љубов која тој ја чувствувал кон Македонија, поради приемот кај публиката, убавите спомени од минатогодишното издание на „Охрид фест“ и секако, поради почитта кон првиот човек на фестивалот, композиторот Григор Копров.
-Неговата желба е безусловно прифатена од фестивалот, бидејќи почитта е обострана, па така на Интернационлна вечер на Охрид фест, на 31-ви август, повторно ќе го видиме и чуеме Дадо Топиќ, информираат од организацијата на фестивалот.
-Сосема спонтано посакав овој мој јубилеј да го прославам токму на „Охрид фест“, раскажува Дадо.
-Во Македонија се чувствувам величенствено, луѓето ме застануваат на секој чекор, на аеродром, на улица, во ресторан, сите се заблагодаруваат за песната „Македонија“, велат: Дадо ни подари најубава песна, тоа е нашата химна, а тоа се зборови што не можат да се заборават.
Инаку, минатата година, песната наполни 50 години и „Македонија“ ја имам постојано на репертоар. Луѓето ме прашуваат за значењето на песната.
„Тамо где вечно сунце сја, тамо је Македонија“ е посветена на сонцето, го имате на знамето, имате многу сончеви денови во годината, богата историја, мирен, музикален и срдечен народ, а таа песна, наградена на ланскиот „Охрид фест“ ја доби плакетата што ја краси мојата работна соба… Мојата љубов кон Македонија потекнува од најраната младост- вели Дадо.
Додава дека мајка му била многу музикална и кога се чистела пченка по далматинските села, пеела македонски песни, а тој слушал, регистрирал и полека си потпевнувал во себе.
-Инаку, мојот менаџер Илија Јовановиќ има одлична соработка со Охрид фест, пријатели сме со Григор Копров, неуморен директор и идеен творец на фестивалот кој наголемо го реализира 31-вото издание. Ве очекува изненадување за фестивалот, нека остане тајна уште некој ден…
И за крај, со нетрпение чекам да дојдеме во Охрид, би сакал за време на гостувањето да ги посетиме Билјанини извори и така да го прославиме мојот јубилеј, кој ќе биде одбележен со низа концерти низ поголеми градови во регионот. Во меѓувреме ја очекуваме биографијата, монографијата и збирка на песни што ги напишав. Се гледаме на „Охрид фест“- порача Дадо Топиќ.
Вики Клинчарова
Фотографии: А.Станковиќ