Денеска се собравме тука, не само како претставници на нашите држави, туку и како чувари на правдата, мирот и вредностите кои нè поврзуваат како глобална заедница. Темата: Последиците од руската агресивна војна против Украина и улогата на националните парламенти во обновата на Украина, има тежина која се протега надвор од нашите непосредни грижи. Таа зборува за нашата посветеност на почитувањето на принципите на меѓународното право, на човековите права и светоста на нациите, изјави претседателот на Собранието Талат Џафери во обраќањето на Европската конференција на претседатели на парламенти што денеска и утре се одржува во Даблин.
Според него последиците од руската агресија против Украина одекнаа низ континентите, оставајќи зад себе трага на уништување што ја надминува физичката инфраструктура.
-Бројот на човечки животи, раселувањето на милиони и уништувањето на културното наследство, служат како остар потсетник за итната потреба од колективна акција, изјави Џафери.
Според бего додека се осврнуваме на последиците од оваа војна мора да ја препознаеме и критичната улога што ја играат националните парламенти во обликувањето на идниот наратив на Украина.
– Нашите земји веќе презедоа чекори за пофалба во обезбедувањето помош и засолниште за погодените од конфликтот. Да го надградиме овој дух на солидарност и соработка, насочувајќи ги напорите во опиплива поддршка за закрепнувањето на Украина. Во ова демократско опкружување, поседуваме единствена привилегија и моќ да ги трансформираме зборовите во дела и намерите во политики. Како парламентарци, нам ни е доверена задачата да го обликуваме текот на судбините на нашите народи. Денес, ја прошируваме оваа одговорност да опфати поширока визија – визија за солидарност која не познава граници, посветеност да се помогне на нација во неволја, изјави Џафери.
Отпорноста на Украина наспроти неволјите, според него, е доказ за нескротливиот дух на украинскиот народ и вредностите што ги имаат.
Според него треба да се одговори со еднаква решителност, нудејќи не само сочувство, туку и непоколеблива поддршка.